Araba ARF Tour ekitaldiak rock&rollaren arima Santikurutze Kanpezura eramango du bere bosgarren edizioa ospatzeko

Araba ARF Tour ekitaldia uda honetan itzuliko da bere bosgarren edizioarekin, rock & rollaren espiritua Mendizabalatik haratago zabaltzeko funtsezko ekimenetako bat bezala sendotuz eta Azkena Rock Festival jaialdiaren sentimendua Arabako lurraldera hurbilduz. Oraingoan, ekainaren 13an Santikurutze Kanpezu herrian egun bakarrean ospatuko da, herria jaialdiaren nortasun musikalarekin lotuko duen doako egitarau batekin, tokiko taldeak eta nazioarteko izenak uztartzen dituen rock, punk, soul eta garage generoetako artisten hautaketa zaindu bat bilduz.

Eskoziatik iritsiko dira Bratakus, Breagha eta Onnagh Cuinn bikiek osatutako punk bikotea, duela gutxi The Hivesen teloneroak izan direnak eta ausardia, ironia eta kritika soziala uztartzen dituen musika egiten dutenak. Bestalde, Alexis Evans frantziarrak bere soul klasikoaren, funkaren eta bluesaren arteko nahasketa dantzagarria eskainiko du, energia garaikidez betea.

Euskal ordezkapena La Secta garage punk eta rock&roll talde bilbotar beteranoaren eskutik etorriko da eta haien azken lana Buscando la luz aurkeztuko dute. Halaber, Pelo Perro Kanpezuko tokiko taldeaz gozatzeko aukera ere egongo da, apaingarririk gabeko rock proposamen gordinarekin aurkeztuko direnak.

Edizio berri honekin, Araba ARF Tour ekitaldiak lurraldearekiko konpromisoa indartzen jarraitzen du, Azkena Rock Festival jaialdiaren sugarra bizirik mantentzen duen topagune bat sortuz, publiko guztientzat eskuragarri dagoen inguru hurbil batean.

Antolakuntzak eskerrak eman nahi dizkie Arabako Foru Aldundiko Kultura Sailari eta Santikurutze Kanpezuko Udalari, musika jardunaldi hau aurrera eramateko erakutsitako inplikazioagatik eta babesagatik. Programazioak Azkena Rock Festival jaialdiaren 24. edizioaren atariko gisa balioko du, ekainaren 18, 19 eta 20an ospatuko dena, eta rock&rollaren sugarra Arabako lurralde osora zabaltzen lagunduko du.