Azkena Rock Festival jaialdiaren behin betiko kartela iragarri eta 24. edizioko egunez eguneko banaketa aurkeztu dute

Azkeneko egunean askotariko musikariak izango ditugu: Social Distorsion taldea gurera dator berriro 2022an bisitan izan ostean, eta hamabost urtean kaleratu duten lehen lana aurkeztuko digute Mike Ness eta bere taldekideek, Born To Kill diskoa, rock & roll klasikoaren, countryaren eta bluesaren ikasbide. Carpenter Brut arima rockzaleak konkistatzera etorriko da Mendizabalara, eta proposamen elektroniko bereizgarria ekarriko digu horretarako, sintetizadoreak metal industrialenarekin nahastuta; bestalde, egungo country alternatiboaren figura garrantzitsuenetako bat zergatik den frogatuko digu (Drive-by-Truckers ohia den) Jason Isbell and the 400 Unit taldeak. Alcalá Norte etorkizun handiko banda bat baino gehiago dela aldarrikatzera igoko da agertoki gainera; Sleaford Modsekoek gure gizarteko egia deserosoak errepasatuko dituzte ironiaz eta post-punk musikaren bitartez; Superchunk taldea powerpop zintzoenaren zaleen gozagarri izango da; Dischargeren txanda denean doinu suntsitzaileak izango dira nagusi taldearen hardcore d-beat nahasketa beteranoarekin; eta Therapy? bandak Troublegum disko ezagunena interpretatuko du. Street-punk soinuak ere izango du tartea Mendizabalan Split Dogs taldearen eskutik, baita cow-punkak ere, Vandoliersekin, eta new wave estiloa eta glam estetika ekarriko dizkigu Starbenders taldeak. Leporaren euskal rock indartsua eta Rodeoren stonera izango dira etxeko talentuaren ordezkari azken egun honetan. Synth-punk hipnotikoena Trashvillen aurkituko dugu Cuir taldearekin, eta bertan arituko dira, halaber, Bloodsucking Zombies from Outer Space eta haien horror punk eta psychobilly frekuentziak, Bridge City Sinnersen folk-punk subertsiboa, Capitán Entresijos feat Garganta Profundak gidatutako performance ausart bat eta Twin Ghostsen beste dimentsio bateko rocka.

Eguneko sarrerak eskura daitezke jada, eta prezio berezian erosi ahal izango dira 48 orduz, martxoaren 13ko (ostirala) 12:00ak arte; bestalde, bonuak ere aurkituko dituzue azkenarockfestival.com webgunean. Era berean, Gazte Bonua (100 €+ gastuak, 23 urtetik beherakoentzat) eta Kuadrilla Bonua ere salgai daude, jaialdira elkarrekin etortzen diren lagun talde horientzat (5 bonu erosi, eta 6 eskuratu). Aurtengo edizioan epeka erosteko aukera ere badago, eta 14 urtetik beherakoek sarrera doan izango dute.

Jaialdirako joan-etorriak egiteko autobusen maiztasuna eta kopurua areagotu dituzte antolatzaileek, eta bidaia antolatuak ere eskaintzen dituzte hainbat hiritatik: Altsasu, Arrasate, Barakaldo, Bilbo, Burgos, Donostia, Errenteria, Getxo, Irun, Iruñea, Miranda de Ebro, Portugalete eta Zarautz.

Azkena Rock Festival jaialdiaren antolatzaileek esker ona helarazi nahi diete, bereziki, Gasteizko Udalari eta Arabako Foru Aldundiari, baita La Salve, Kutxabank eta Petronor etxeei ere, ekitaldi hauek gauzatzeko ezinbestekoa baita haien guztien laguntza.