Aramaiotik, The Clayton taldeak euskal rock & rolla darama bandera gisa, punketik abiatu eta hard rockera, bluesera eta Eskandinaviako high energy rockera eboluzionatu duen proposamenarekin. 2018 inguruan sortuak, The Clash, Ramones, Barricada edo The Hellacopters bezalako taldeen bertsioak egiten hasi ziren, baina laster eraiki zuten beren soinu propioa, gitarra zorrotzak, dezibelioak eta oholtza gaineko jarrera bereziki leherkorra oinarri hartuta. Nortasun hori Phoenix eta Over the Red Light bezalako lanetan islatu dute, euskarazko letrekin, eta dagoeneko aurreko Araba ARF Tour-etako batean zuzenean gozatzeko aukera izan genuen.
